Dayak Association Miri

MIRI: Raban Bansa dayak dipinta mayuh agi enggau dalam gerempung gawa sukarela kena ngemansangka bansa siri empu.“Enti ukai kitai (Dayak) ti sanggup ngereja pengawa sukarela mantu bansa kitai, deka ngarapka sapa agi?,” ku Kaban Kunsil Nengeri (ADUN) Pujut, Andy Chia Chu Fatt.

Peminta tu digaga sepengudah nemu tanggung pengawa ti pegai DAM besai dalam ngatur palan Pendam Dayak di Lambir.

“Enggau nya, kita ke datai ditu sehari tu nyadika tanda meri sukung ngagai DAM dalam bejalaika tanggung pengawa ti udah diberi ngagai sida,” ku iya.

Andy madah lebuh bejaku ba Atur Makai Malam Amal ti diatur Gerempung Dayak Miri (DAM) enggau kerejasama Sarakup Indu Dayak Sarawak (SIDS), Gerempung Dayak Iban Sarawak (SADIA) enggau Gerempung Dayak Menua Sarawak (SDNU) pampang Taman Tunku.

Lebih 400 iku urang ke bisi ngulu datai dalam atur nya iya nya bansa Dayak di menua nya ti diatur di Dewan Utama Eastwood Valley Golf & Country ditu, malam hari Lima empai lama.

Sama datai iya nya Kaban Kunsil Nengeri (ADUN) sitak Lambir Aidan Wing, dua seketeri politik Kepala Menteri iya nya Peter Howell Jilan sereta Watson Banggau enggau Tuai DAM Miri, Alexander Isut Karim.

Dalam jaku iya, Andy madahka pengaga ati iya meda semangat sukarela empat gerempung Dayak nya ti betuaika DAM udah bejalaika atur makai malam amal nya.

Dalam jaku iya ti keterubah, Alexander madah objektif atur tu dipejalaika dikena ngumpul pan bagi projek ngatur Pendam Dayak Lambir.

Ku iya, ke diatu, Dam ti megai tanggung pengawa dalam ngatur palan pendam nya udah ngumpul dana penyampau RM19,000 asil ari beri Sapit Kepala Menteri Tan Sri George Chan Hong Nam, Menteri Kuasa, Teknologi Hijau enggau Ai Datuk Seri Peter Chin Fah Kui, enggau Andy Chia.

“Kitai deka nerima pan tambah enda lamada agi laban pengari rayat menua tu bisi udah ngaga danji deka meri bantu atas tuju ke sama,” ku iya.

Entara pengari rayat ke udah bedanji deka meri pan iya nya ADUN Lambir, Aidan Wing (RM3,000), ADUN Lubok Antu Malcom Mussen (RM3,000), ADUN Kemena Datuk Dr. Stephen Rundi Utom ke mega Menteri Muda Rampa Menua enggau Pengerai (RM5,000)  sereta tambah RM4,000 ari Andy Chia taun dudi tu ila.

Ku Alexander nambah, siti aum taun deka diatur kena bulan dua taun nyin ila dalam mantaika penemu ti bekait enggau projek nya, lalu enti projek nya udah bulih kemendar, baru projek nya (pendam) deka dipejalaika.

Source: Borneo Post