Isu pendam bala Dayak engka teputar
DAM deka berakup enggau bala tuai Iban, opis perintah muka lengkas pendam nya
MIRI: Gerempung Dayak Miri (DAM) deka berakup enggau bala raban bansa Iban, kelebih agi bala tuai rumah enggau sida ari opis perintah dalam pengawa ngemutarka isu laun muka tanah pendam Dayak ba Sungai Dalam, Lambir.
Presiden DAM, Alexander Karin Isut madah, pekara tu diputuska dalam siti aum enggau pengari Opis Residen, Opis DO Miri, bala tuai rumah panjai sereta enggau ketuai raban bansa Iban ba Rumah Dayak apin lama ke udah.
“Laban udah diberi tanggungjawab ngatur tanah nya, kami (DAM) komited berakup enggau bala tuai rumah enggau agensi bukai ke besangkut paut dalam pengawa ngumpul belanja duit turu ungkup pendam tu.
“Kami mega udah berandau betunga mua pasal pekara tu, lalu aku ngarapka tu enda nyadi isu agi.
“Utai ke besai bendar guna diatu nya, semua orang udah setuju magang deka sama ngiga belanja laban penanggul duit meh ke ngasuh tanah pendam nya laun dibuka,” ku iya lebuh ditanya kemari.
Karin sebedau tu madah, pekara tu enda teputar enggau lengkas laban DAM enda ulih enda berakup enggau Serakup Dayak Iban Sarawak (Sadia) enggau Serakup Bansa Dayak Sarawak (SDNU).
Apin lama ke udah, seraban 12 iku bala tuai rumah panjai di Miri bisi ngansak DAM nerang madah pekara kebendar pasal nama kebuah laun muka tanah pendam nya di Lambir ke bisi lima eka pemesai lalu udah dikemendarka perintah taun siti tu kemari.
Laban ke laun muka tanah pendam nya, bala raban bansa Iban ditu nyau enda ulih enda nyanda tanah pendam ba alai bukai genap kali bisi orang parai.
Tu laban tanah pendam ba Jalai Riam enggau Batu 8 Jalai Miri-Bintulu nyau majak sekut-sesekut.
Lebuh ngenang enggau silik agi pekara nya, Karin madah, naka kediatu sida udah bisi ngumpul belanja RM10,000 iya nya nyengkaum RM5,000 ke diberi ulih Sapit Kepala Menteri Datuk Patinggi Tan Sri Dr George Chan Hong Nam, RM4,000 ari Kaban Kunsil Nengeri Pujut Andy Chia enggau RM1,000 ke digumpul ari bala kaban DAM.
”Kami mega udah bulih bantu ari Opis DO Miri kelimpah ari minta saup sida ari Opis JKR ngagai jalai tauka akses ngagai tanah pendam nya,” ku iya.
Nyadi kelimpah nya, Ketuai Raban Bansa Iban Sitak Miri Pemancha Wilson Siang Lim mega ngarapka bala raban bansa Dayak enggau DAM ulih berakup enggau pangan diri ngumpul tauka ngiga belanja kena ngisi duit turu ungkup ngadu pekara pendam nya.
“Kitai ngarapka isu tu ulih ditangkup enggau naka pemanah ulih, laban meda tu meh pendam tunggal ke disediaka perintah ungkup raban bansa Dayak ditu,” ku Wilson.
Nyadi perintah dalam bulan Mei 2008 udah ngemendarka pendam nya digaga ba tanah ba Sungai Dalam lalu ungkup dempu DAM ke diberi kuasa ngadu pekara nya. Tang laban udah lebih setaun dikemendarka, pendam nya lalu apin ulih kena sampaika iya ngasuh raban bansa Iban ditu mantai tanya pasal pekara nya, lalu ngujungka iya nyadi siti isu.
Source: Borneo Post
